Mae’r gwesty’n gweini 40,000 o brydau bwyd y flwyddyn - ble maen nhw’n prynu eu cynhwysion?
Mae amrywiaeth enfawr o brydau bwyd ar fwydlen The Bear, yn amrywio o ffefrynnau megis ffagots, coes cig oen a lasagne i brydau pysgod, pwdinau a Chaws Cymreig. Ac mae rhestr o brydau tymhorol ac arbennig ar y bwrdd du bob dydd. Mae’r broses o fwydo’r miloedd o bobl sy’n aros yn y gwesty neu sy’n cerdded trwy’r drws bob mis yn her logisteg enfawr.
“Rydym yn falch i gefnogi cyflenwyr ble bynnag y gallwn,” meddai Lynda Hall, Rheolwr Gweinyddol Gwesty’r Bear yng Nghrug Hywel, “rydym wedi meithrin perthynas gyda llawer ohonynt dros y degawdau, ac rydym yn ymddiried ynddynt oherwydd rydym yn sicr o dderbyn cyflenwad cynhwyson cyson a rheolaidd, o safon am y pris iawn.”
Daw rhan fwyaf o gig y Gwesty gan gigydd Richards dros y ffordd, a daw’r llysiau gan PJ Jones, cyfanwerthwr o’r Goetre. Hufenfa Stuart Grainger o Grug Hywel sy’n cyflenwi’r llaeth, hufen ac iogwrt, mae’r cyw iâr a’r eog yn cael ei ddarparu gan Black Mountains Smokery ar gyrion y dref. Maen nhw’n defnyddio Popty Askew ar y Stryd Fawr a llu o siopau lleol eraill ar gyfer anghenion achlysurol. Nid yw’r holl gynhwysion crai a ddefnyddir gan y cyflenwyr hyn yn cael eu tyfu neu eu magu’n lleol, ond yn dod o bellach i ffwrdd yn unol ag arferion ffermio cyfoes.
Mae’r Bear yn prynu rhai cynhwysion lleol: llysiau tymhorol gan Primrose Organics o Aberhonddu, wyau o fferm Richard Lewis ochr draw i’r dyffryn, mae’r Cig Carw’n dod o Siop y Fferm ym mhentref Bwlch 6 milltir i ffwrdd, ac weithiau maen nhw’n prynu cig oen gan ffermydd lleol. Mae gan y Prif Gogydd ryddid i benderfynu beth sy’n mynd ar y fwydlen arbennig, trwy ddewis y cynhwysion sydd ar gael. Dywed Marc Montgomery: “Mae gan Gymru lu o gynhwysion rhagorol i’w cynnig; cig oen Cymreig er enghraifft – y cig oen gorau trwy’r byd. A thrwy ddefnyddio ffermwyr bach lleol, mae’r llysiau tymhorol yn ddelfrydol ar gyfer ein bwydlen arbennig oherwydd gellir ei newid bob dydd, dwywaith y dydd weithiau’n dibynnu ar y cynnyrch ffres sydd ar gael.”
Felly, fyddai’r Gwesty’n defnyddio ei rym sylweddol fel prynwr i ddylanwadu ar gyflenwyr i ddefnyddio mwy o gynnyrch gan ffermydd lleol?: “Yn bendant,” meddai’r Rheolwr Gweinyddol, Lynda Hall, “os gallwn gadw’r ffefrynnau ar y fwydlen – mae pobl yn dod nôl dro ar ôl tro i’w bwyta – ac mae’r prisiau’n gyson. Yn sicr, mae’n werth defnyddio cynhwysion lleol, ond ydyn nhw ar gael am yr un prisiau? Os nad yw’n bosib, byddai’r cwsmeriaid yn fodlon talu mwy – dyna’r cwestiynau mwyaf o’n safbwynt ni?”
Erthygl a lluniau gan Tim Jones, As You See It Media
The Bear Hotel
BwytaiCyfeiriad | The Bear Hotel, Stryd Fawr, Crug Hywel NP8 1BW |
---|---|
Gwefan | www.bearhotel.co.uk |
Ffôn | 01873 810408 |
Rydym yn gwerthu/gweini bwyd a wnaed yn lleol o |